Bokelskere.no

Eg kviskrar det nesten...;-), men eg blir med. (Du skjønar at eg hadde ein lovnad i heimen om å redusere kraftig på "skal-lese lista" mi, men boka er komen i hus. Ei bibliotekutgåve som ser ut til å ha gleda mange.)

Er heilt enig med deg i at denne gir meir enn dei to første. Det konfliktfylte kjærleiksforholdet mellom dei to venninnene er fascinerande. Synest forfattaren er svært personleg i skildringane, og at ho har fått med mykje om både familiane og om mafia, i tillegg til den politiske utviklinga i Italia på 60 og 70-talet.
Gler meg til å lese fjerde og siste boka, den står i hylla og ventar.....

Nynorsk spenning

Psykologen Ina Grieg vert kontakta av styraren ved Hagaheimen, ein institusjon for kriminelle. "Den stumme",valdsdømte, har rømt frå avdelinga. Ina Grieg kjenner rømlingen frå før, ho har vore ein av få som har greidd å få kontakt med han.
Og ikkje langt unna har det skjedd eit dobbeltdrap.

På same tid vert sjukemelde etterforskar Hugo Fannrem kontakta om ei drapssak som vert forelda om to dagar. Ein journalist vil at han tek tak i saka som har band tilbake til Svanviken arbeidskoloni i Møre og Romsdal. Trass i at Fannrem har hatt ei tung tid, kjenner han at arbeidslysta kjem sigande tilbake ....

Dei to sakene vert litt etter litt samanknytte, og det viser seg at vonde hendingar frå Svanviken og behandlinga av romanifolket der spelar ei rolle. Om dei ikkje lærte seg norsk levemåte, vart borna tekne frå dei. Svanviken hadde lite å vere stolte av!

Boka er spennande og velskriven av forfattaren som i år er festspeldiktar ved "Dei nynorske festspela"

Humoristisk samfunnskritikk

I den vesle landsbyen Gosseli i Kina bur 197 funksjonshemma menneske, og så nokre få friske, då.
Dei blinde, einøygde, halte, døve, stumme og lamme har fredfylte dagar i utkanten av det meste, men dei samarbeider og er tilfredse med livet.
Så rammar naturtragedien dei, tørke og uår vert katastrofalt! Gode råd blir dyre.
Distriktsleiaren kjem då med ein vanvittig og god ide: Gosseli må kjøpe liket av Lenin frå Russland. Mange vil kome for å sjå, noko som igjen vil føre til nødvendige inntekter og mat. Og- for å få nok pengar til å finansiere kjøpet, må dei bruke det dei har; nemleg ein underhaldningstrupp som kan opptre mot ein liten sum.

Med sitt sjølvkomponerte, originale program legg dei halte, døve, stumme, blinde.... i veg. Og i starten er dette suksess! Tilskodarane strøymer til, og det same gjer pengane. På ganske kort tid vert Gosseli ein del av det kapitalistiske Kina, noko som igjen får store følgjer både for truppen og Gosseli!

Boka er original både i språk og innhald, og den har rikeleg med setningar og formuleringar som er overraskande og latterframkallande.
Eit verk som fortener mange lesarar!

Å, kor dumt, Lillevi! Håper du kan bli med seinare, det er så kjekt å lese innlegga dine! :-)

Eg greier nesten ikkje å bestemme meg, har fleire gode nordiske bøker som eg kunne ha tenkt meg å foreslå, ma Bli Bjørk av Mette Karlsvik. Hadde vore interessant å lese noko frå Island, og boka har fått gode kritikkar.
Trur likevel at mitt forslag blir: Emma og Uno av Märtha Tikkanen. Boka handlar om det turbulente forholdet mellom forfattaren sine besteforeldre. Kanskje det kan vere ei bok som evt kan gi ein god diskusjon??

Ja, dette var jammen triveleg! Luringen Henry er både sympatisk og utspekulert. Rett ein kar som lurer både vener og dei meir ukjende!
Måtte humre meir enn ein gong.

Du har rett i at mange scener er svært så visuelle.
Alt i alt er det ein intrikat roman, med både humor og spenning- underhaldande! ....og lettlese!
Trur eg endar med terningkast 5, men det er kanskje snilt, då......

Då er "Pesten" avslutta her i huset. Det har vore ei spesiell bok på mange måtar, ei bok som både gir ettertanke og grøss.
Fleire stader har eg sett at romanen er eit bilete på nazismen, kanskje både som ideologi og som konsekvens av det nazismen førte med seg.
Eg opplevde det som spesielt at rottene som kom som varsel på død - og seinare som varsel om betre tider. Korleis ein skal tolke det, veit eg ikkje .....
S220 i mi bok var innhaldet skildra nesten som om det skulle vere frå ein tysk konsentrasjonsleir, med massedød og massegraver. Ekkelt......

Eg opplevde også at Camus framstilte "Pesten" som ein fiende med menneskeleg trekk.
Mi bok er proppfull av merker eg har sett for gode uttrykk og skildringar, trass i eit innhald som ikkje er av det mest lystelege slaget - når ein ser bort frå det menneskeleg samhaldet og den omtanken dei hadde for kvarandre.

Eg er glad for å ha lese boka som kan framstå som eit bilete på både tidlegare og noverande diktatur og autoritære system.
Kar: 5

Sitat frå Wikipedia:

På ett plan er Pesten blitt lest som en allegori over kampen mot nazismen, men vanligvis er det romanens diskusjon av menneskenes grunnvilkår som framheves. Ved å legge handlinga til et samfunn som utsettes for ekstreme påkjennelser, isolert fra omverdenen, demonstrerer Camus her en egen form for eksistensialisme.

Denne helga har eg fått lese max, ma bibliotekboka Arv og miljø av Vigdis Hjorth som var - for meg - uventa god. Så har eg saman m gemalen høyrt ferdig Magnetisørens femte vinter av Enquist, også den lånt på biblioteket. Vi måtte ha ei bok i bilen sidan vi har køyrt til å frå til ymse besøk nokre dagar. Hjelpe meg, for eit tema med skildring av ein mektig svindlar. Men, også Enquist skriv godt.
I kveld får eg starte på Pesten igjen, før eg gløymer alt. Litt uvant for meg å bruke så lang tid på ei bok.

Kvifor eg les?? Det er sjølvsagt fordi det gir dagane mine innhald på så mange vis. Eg begynte å lese frå eg lærte meg bokstavane, og trur eg heile mitt liv har hatt ei bok på nattbordet. Bøkene gir meg så mange opplevingar, både vonde og gode som eg ikkje ville ha vore utan.

Og...i morgon skal eg hente Mammutbestillinga mi. :-) :-)

Ha ein fin kveld, og kos deg med boka di!

Så har også eg lese boka om Berglijot og familien, og deira arvestrid. Mi utgåve vart henta på biblioteket etter lang ventetid, og forventninga mi var heller liten. Men, dette vart ein roman som fenga meg. Eg var kanskje litt stuss over nokre endringar i skrivestil undervegs, men innhaldet hadde spenning og driv.
Eg er ganske sikker på at mange har opplevd konfliktnivået i familien når det gjeld arv og fordeling, noko som gir gjenkjenning på eit eller anna plan. Og når familien endåtil er splitta på det nivået som Hjorth skildrar her, så er det sterkt å lese.
Alt i alt - ei bok som gjorde skepsisen min til skamme!
Her vart det terningkast 5

Du har heilt rett i at boka har spenning på fleire plan. Det å skulle vere innestengde og vite at pesten er der saman med dei og kan slå til kva tid som helst er ei psykisk påkjenning som merkast.
Eg lurer elles litt på det om metfor og allegori er det same, eller meir eksakt: Kva er skilnaden? Las ein stad at romanen kan sjåast på som ein allegori....

Har fått lese nokre få sider i dag, og innhaldet har gitt mange tankar..
I kyrkja har pater Paneloux kasta ut påstandar om at pesten er Guds straffedom over byen, ei straff for ein ukjend forbrytelse.
Mange kjende seg fanga innanfor murane, mellom anna journalisten Rambert. Både han og mange andre venta på at pesten skulle gi seg, men med vakker sommar i kontrast til uhyggen, så auka dødstala i varmen.

Det er i ulykkene tid en venner seg til sannheten, det vil si til taushet. S 106

Det gjer inntrykk å lese om kva som skjer i eit kriseramma samfunn. - det fører tankane både til historiske kriser - og ulike situasjonar i verda i dag.
Håper at vidare lesing gir både "gode" opplevingar og nokre svar....

Lagt til:

Men mener De som Paneloux at pesten har sine gode virkninger, at den åpner øynene til folk og tvinger dem til å tenke? S 116

Fekk lyst til å ta med dette sitatet, sidan boka er ein allegori.....

Pesten vert styrande, for ein heil by. Det er skremmande!
Eg har lese eit stykke inn i del to, og det er spesielt å lese om korleis eit samfunn opplever det å bli stengt ute frå omverda. For manga verka heile situasjonen uverkeleg, medan det å ha nok mat og anna blir viktig. Religion og Gudstru får større meining når døden vert så nær dei.

Eg har bestemt meg for at boka skal få kvile no, iallfall til over helga. Eg høyrer på lydbok for tida, Magnetisørens femte vinter av Per Olov Enquist, der er det også sjukdom i fokus. Trur eg må ha noko anna eit par dagar!

Ha ein god ferie, både med "Pesten", og kanskje litt sol og varme?

Då har eg leita fram mi utgåve av "Pesten", bokklubb-bok frå 1971 - inndelt i fem deler og med illustrasjonar.
Det første som skjedde var at boka var så porøs i permen at eg måtte fram med teipen.
Når eg starta på lesinga vart eg nesten heilt "satt ut"! Byen Oran framstod som så stygg og utriveleg at ein nesten ikkje kan tru det finst folk der. Når så hovudpersonen, lege Bernard Rieux, oppdagar først ei rotte, og så ei til, og så endå fleire .......kom uhyggen verkeleg krypande!
Rottene er eit frampeik på pesten som dukkar opp i all si gru. ( Har lese til s 36)

Eg opplevde skrivestilen som spesiell, konservativt språk i mi utgåve, og med setningar som skildrar direkte og utan omsvøp. Ser også at forfattaren går inn i romanen, som allvitande: Før beretteren går i detaljer i de nye begivenhetene, tror han det kan være nyttig å gjengi et annet vitnes oppfatning.....

Skal prøve å ikkje lese boka for fort, vi har god tid på oss. Og, skal iallfall lese resten av del 1 på dagtid!

Det har vore vanleg at bøkene som ikkje vert selde i sjølve Mammutperioden vert ytterlegare prisreduserte etterpå, men då er det ikkje sikkert du får dei du har lyst på. Ser elles at du har bestilt nokre gode bøker, du har noko å sjå fram til der! :-)
Eg sjølv vart noko skuffa over Mammutsalget i år. Mange av bøkene har lagt til redusert prisar ganske lenge. Likevel vart det bestilt nokre bøker til mine overfylte bokhyller i år også:
Snø fra Brasil
Sannheten om Harry Quebertsaken
Forelskelsene
Brødrene Vega

Om det er gode kjøp, veit eg ikkje. Men, litt å gle seg til er det kanskje.

Hadde verkeleg store leseplanar for helga, men pga hendingar i familien, positive ja, så vart det mindre enn tenkt. Har likevel ei svært triveleg bok som kveldslektyre, nemlig Grønn var min barndoms dal av Richard Llewellyn. Ei bok som eg verkeleg kosar meg med, mykje betre enn eg hadde forventa. Skal sjå filmen om eg får fatt i den.
Og sidan vi må reise litt fram- og tilbake ei stund, har eg fått fatt i ei lydbok, Magnetisørens femte vinter av Per Olov Enquist. Ei spesiell bok verkar det som, etter det vesle vi har høyrt. Men, at Enquist kan skrive er det ingen tvil i!

(Kan ikkje tenkje meg at Trump les noko som helst litterært, trur han har meir enn nok å gjere med å finne forklaringar på utspela sine.)

Helga har ikkje så mange timar igjen, men ha ein god kveld og ei god, komande leseveke!

No vart eg jammen overraska! Trudde Trekket mot nord skulle få mest stemmer, og hadde tenkt å finne den på biblioteket.
Mi Pestbok står i hylla, kjøpt for nokre år sidan på vår lokale bruktbutikk, saman med fleire andre. Veit ikkje kva boka vil gi, men ser iallfall fram til å dele opplevinga med fleire!