Bokelskere.no

å leve
er ikkje akkurat det lettaste som finst
ikkje alltid vakre roser
og fin musikk
men sidan no
dette orgelet likevel står her
kan vi vel spele litt på det

(Arne Ruset: å leve)

Alf.A Sæter.

Frieri

Først
vil eg kyssa deg på panna
i solskinet
under eit vårgrønt lindetre,
så
på nasetippen
ytst på en tom brygge ein junikveld
med seglbåtar
og frålandsvind.
Seinare,
varsamt på kinnet
ved ei stilt glidande elv
i flatt landskap,
og til sist
på munnen
i turistmylderet
på troppa til ein katedral
i ein ukjend by.

Då seier du kansje ja,
– om eg spør?

Olav H.hauge

Skeiserenn

Du startar i lag med storskridaren.
Du veit du kan ikkje fylgja han,
men du legg i veg
og brukar all di kraft
og held lag ei stund.

Men han glid ifrå deg,
glid ifrå deg, glid ifrå deg –
Snart er han heile runden fyre.

Det kjennes litt skamfullt med det same.
Til det kjem ei merkeleg ro yver deg,
kan ikkje storskridaren fara!

Og du fell inn i di eigi takt
og kappstrid med deg sjølv.
Meir kan du ikkje gjera.

Ann Kavli

Oss, retning

Eg veit
Ikkje kvar
Vi skal

Men eg gler meg
Medan vi kjem dit

Einar Økland

På utekafé

Når livet er godt nok
seier vi ikkje stort.
Myser mot tankane.
Nippar til kaffien.
Grip etter glaset.
Flyttar beina.
Hallar oss bakover.
Ser oss ikkje ikring.
Mumlar berre så vidt.
Kjenner vi har
det gode i oss.
Svelgjer det
ned.
Bøyer oss fram att.
Flyttar beina tilbake.