Bokelskere.no

Å kalle boka si om William Shakespeare for ”The Biography” kan verke noko pretensiøst, for ikkje å seie arrogant, men så ser ein at Peter Ackroy må ha rett: Det kan da ikkje vere noko biografi om skalden frå Stratford som er betre enn denne! For eit driv! Vi får historie, sosiale forhold, familie, privatliv og litteratur i eitt, der den eine informasjonen og vurderinga driv den andre med seg til ei logisk oppbygd bok utan dei spekulasjonane og mytane som er spunne om diktaren. Ackroy viser, utan å trekkje for bastante konklusjonar, at Shakespeare truleg kom frå ein katolsk familie – med alt som dette innebar ved overgangen mellom 1500- og 1600-talets England. Kanskje kunne boka ha hatt meir stoff om verka, men slikt treng ikkje ein biografi å innehalde, og slikt kan vi finne i andre samanhengar. Eller helst: Ved å lese og sjå verka. Dette lyt vere ein av dei mest fengslande biografiane om ein forfattar!

Einig! I staden for å spekulere, viser Ackroyd mellom anna korleis kvardagen praktisk fungerte, også når det gjeld religionsutøving, og korleis også kvardagens meir eller mindre trivialitetar påverka stykka til Shakespeare.

Sidan pesten slo til i London med jamne mellomrom, måtte teatertruppane vere budde på å reise på turné. Dermed var det viktig å ikkje vere avhengig av å dra på for mykje og Shakespeare-stykka kan altså spelast med veldig få rekvisittar. Sidan Shakespeare var deleigar i The Globe og interessert i størst mogleg overskot, begrensa han bruken av "special effects" i stykka. Berre to små døme som illustrerer korleis boka forklarer Shakespeare i ein omgjevnad i ei samtid som gjev eit veldig interessant, lettlest og underhaldande bakteppe for stykka.