Bokelskere.no

eplet

eg bit i eplet mitt
smaken er søt og gul
tennene tygg, tunga smattar

då det første mennesket
beit og åt
av det første eplet
plukka frå det første epletreet
i den første frukthagen i verda

smakte det akkurat likt
det eg kjenner på tunga no?

stort og lite

nedst i bakken ligg ein gard
tre raude hus og ei bjørk
ved fjorden

sett frå trappa vår
er traktoren i graset
så liten som ein katt

kor langt unna
må noko stort vere
for å bli lite?

korleis kan jorda vere
stor for meg
men lita som eit fugleegg
der ho sviv
i verdsrommet?

på ei trapp

vi er tre på trappa
utanfor huset
trinna er varme av morgonsol

eg sit nedst med eit eple i handa
ovanfor meg søster Sara

øvst ved døra
sit katten Jupiter
han ser på oss
som om han er den einaste
som veit alt

her bur vi