Bokelskere.no

Eg dreg ei av desse kvasse, avlange steinflisene mot handflata og kjenner ho rispe mot huda. Set du fart på denne odden, er han meir enn skarp nok til å trenge gjennom selskinn, hjortehjarte og mannebringe. Den kvasse eggen gav mennesket makt over dei store dyra. Kva ville vi vore utan? Mjuke, spinkle apekattar utan panser, klør eller hoggtenner, hjelpelause byttedyr for isbjørn og sabeltanntiger. Men menneska laga sine eigne hoggtenner av stein og bein, vi fekk flygende klør som kunne drepe på avstand. Mange dyr brukar reiskapar, men berre menneska formar reiskapene sine etter eige hovud. Slik la vi verda under oss. Og slik kan vi øydeleggje ho.