Bokelskere.no

FLYET

Det skinande blanke flyet
skar yver tind og kluft
og kvorv i glimande solauga
høgt i den marsblå luft.

Det var som svingande kvernor
djupt inni rømdi song.
Det svara frå kvite vidder
og dura i fjelldalen trong.

Frå framande heimar kom det,
eit bod frå ei onnor tid:
Grendi skrokna og låg att
i tussegrått vinterhi.

TVO GRAVER

No er dei komne i same seng,
ho Abbelin og han Sjovat Dreng,
daude og vel forsytte.
Hadde dei kome i hop fyrr, dei tvo,
kunde det vore til gagn, men no
er det til ingen nytte.

Ung var ho Abbelin, Sjovat au,
men gjorde ikkje som blodet baud
men øydde sin ungdom i slitet
til dei krokna i rygg og skora på horn,
- tvo ugifte, eismala, utan born -
Og no deira bein er kvite.

SNIGELEN
Snigelen skrid yver vegen
med augo på stett.
Han gjev svarten
i farten
berre leidi er rett.