Bokelskere.no

Men det er ikkje berre språket som er i ferd med å gleppe. Eg føler at eg er i ferd med å miste alt eg har brydd meg om. Pappa sa at eg må finne attende til gleda. Men inni meg er det dødt. Like dødt som på kyrkjegarden.

Latteren din er nesten tydelegare no når han er borte. Sjølv når du ikkje er her, er du midtpunktet i familien.

No er grava di berre ein jordhaug med litt ugras på. Det er så fælt å tenke på at du ligg gjøymt i den kalde molda. Kva tenker du på der nede? Kjenner du at frosten er på veg? Eg gruar meg til å legge meg i kveld. Eg frys på føtene og langt oppetter beina, som om kulden i jorda har krope opp i meg.