STUNDOM

stundom
når hendene mine
byd seg nakne
hungrande fram
og alt i meg
er rop og lengt
kan eg kjenna
varsamt strok
over kinn
og dei kviskrar
som vindsus
mildt om mitt
hjarte

FOR DEG

for deg
har eg kledd
naken min sjel
latt mine draumars
fuglar sleppa fri
og fylla lufta
kring oss med song

mot deg
var eg open elv
og skjelvande angst
var eg fridomens segl
og lekkjenes slave

som vind var eg
over høge tindars toppar
dine botnar
var stengde

enno står eg naken
ved bredda av mine
draumar
ennå
ventar eg

NÆR OG BORTVEND

du som var vind
over mine dagars
stille
du
som let draumar
spira
som vende
andletet bort
men var nær
gjennom tidlause
lengtande
stunder

tomme
er mine hender
som har halde
om eit svar
som rann bort

NÆR PULS

du er min kjærleik
og mi einsemd
at eg såg inn
i ditt liv
omslutta
av din lengt
aldri for nær
slår livspulsen
ditt namn
i mine årer

KOM

kom
la oss stiga
fram
or vår einsemd
dryssa vår
lengt
mot einannan
hungrande
nakne