Bokelskere.no

Kvar morgon finn enkemann (73) fotoalbumet og stansar ved bildet der kona (1938-2011) lener seg fram for å kviskre noko i øyret hans.

Kvar dag spør mann (80): Kven er du? Kvar dag svarar kvinne (77): Kona di. Kvar dag streifar handa hennar kinnet hans.

22:58 | han kjem etter og legg seg tett inntil henne | eg har eit viktig møte i morgon, seier ho | eg har eit viktig møte akkurat no, seier han.

Enkemann (82) leitar overalt, men gifteringen er borte. Han blir sitjande med fotoalbumet, stirar på bryllaupsbildet der ho smiler mot han.

Han forsøker seg med å seie noko fint, men ho ser ikkje ein gong opp frå iPhonen. Han hugsar den tida ho ikkje makta å ta auga vekk frå han.

Nokon har strødd et lag melis i gata. Litt utpå dagen kan ein sjå fotspora til leikande jenter (3). Ingen djupe tankar, bare litt lykke.

Rusa på kyss og kvarandre oppdagar dei ikkje at snøen sakte dekker bilen dei sit i. Så ler dei. Gut (20) er blitt kjærast med gut (22).

Først dei små håra på armane hennar. Så armane. Så halsen. Så munnen. Leppene. Kinna. Auga. Øyra. Håret. Så er han forelska i heile ho (22).

Faren gir han Ronaldo drakt. Mora gir han snop og cola. Han er åtte, heng på McDonalds i Madrid-drakta, vil aldri skåre eitt einaste mål

Klede. Tøflar. Toalettsaker. Amme-bh. Helsekort. Coelho-bok. Mann (28) sjekkar konas bag.
-Coelho? På klinikken?? Då får du føde utan meg.